Амадузына jединген

Рейтинг:   / 1
ПлохоОтлично 

«Jопон jер бойыныҥ jалакай улузыла, культуразыла бай»—деп, ӱредӱзи керегинде куучынды Эркелей Уханова баштады. Эркелей—база бир ӧктӧм, амадузына ичкери jӱткип турган jалакай алтай кыс. Ол Jопон jерге барып,  Токионыҥ эҥ jаан университединде, Васэдада, бир jылдыҥ туркунына ӱренип, шиҥжӱ иш ӧткӱрген. 

 

Бӱгӱнги бистиҥ геройыстыҥ чыккан jери ӧлӧтӱ jурт. Адазы Владимир Николаевич, Кош-Агаш аймактаҥ, калада «Эл Банкта» иштейт. Энези Антонина Михайловна Оҥдой аймактыҥ кижизи болтыр. Ол ӱредӱликтиҥ чыҥдыйын кӧрӧр республикан тӧс jердиҥ специализи. Кыстыҥ сок jаҥыс сыйны, Арунай, билезиле кожо Южно-Сахалинск калада jадат.

 

Эркелей республикан гимназияда ӱренип,  кийнинде Новосибирскте башкартуныҥ ла экономиканыҥ университединиҥ (СИБАГС-тыҥ) «Регионоведение» бӧлӱгин божоткон. Студент ӧйлӧрдӧ кыс jопон тилле, бу ыраак jердиҥ тӱӱкизиле, культуразыла jилбиркеп баштаган. Анайып ол jопон тилди ӱренип, Японияниҥ тӱӱкизиле колбулу билим иш бичиир санаага келди. Билгирлерин тереҥжидер амадула Эркелей Санкт-Петербургтыҥ госуниверситединде аспирантурага экзамендерди jедимдӱ табыштырган.

 

  «Билим ижимниҥ темазы сӱрекей элбек, jе jилбилӱ. Оны тереҥжиде шиҥдеерге мен Jопон jер jаар барарга амадап туратам»—деп, Эркелей  куучындады. Бир кӱн Jопон jердиҥ посольствозыныҥ сайтына кирип, jиит аспиранттарга гранттардыҥ конкурсы jарлаганы керегинде кычырып, ол бир де алаҥзыбай,  ары угузуны ийген. Jолго стипендия берилген учун бу талдаш сӱрекей jаан болгон деп айдар керек. Ырыс тартып, Эркелей талдалган ас тоолу аспиранттардыҥ тоозына кирген.

 

Jерлежис Токионыҥ Васэда деп эҥ jаан университединде ӱренип, семинарларга, лекцияларга jӱрӱп, билим ижине керектӱ кӧп jетирӱлер алды. «Биске, ӧскӧ jерлердеҥ келген студенттерге, jадар jерлер берилген. Jе ол бистиҥ орооныстыҥ общежитиелеринеҥ аҥыланат, чек башка. Кажы ла кижиге ончо jанынаҥ jепселген студия-кып  чыгарылган. Онызы меге токыналу ӱренер, иштенер арга берген»—деп, кыс айдат.  

 

Токиодо ӱредӱ английский тилле ӧткӱрилген болзо, тышкары, jондык jерлерде jӱрӱп, jопон тилле эрмектежер керек эмтир. Jе мында алтай кыста буудактар болбоды. Новосибирскте jопон тилди ӱренген болзо, школдогы ӧйдӧҥ ала Эркелей английский тилди jакшы ӱренген, керек дезе каланыҥ ла республикан кеминде ӧткӱрилген олимпиадаларда турушкан. «Jопон тилде кӧп иероглифтер, jе оны ӱренип аларга кӱч эмес. Jердиҥӱстинде оноҥ до кӱч тилдер бар»—деп, кыс темдектейт.

 

Ыраак  jерде ӱренген кажы ла кижи тӱҥей ле jаныксап, Алтайына тартылып турат. Эркелейдиҥ Горно-Алтайскта ада-энези jадат, оныҥ учун кыс ӱредӱзин божодып, капшай ла Тӧрӧлине jанды. «Сыйным Южно-Сахалинскте, оныҥ учун ада-энем экӱ ле болзо, jаман эмей. Эмди мен jуук улузымныҥ jанында амырайдым. Алтайымнаҥ ийде-кӱч алып, ойто Санкт-Петербургка барып, ижимди улалтып, корыырым»—деп, Эркелей куучындады. 

 

Айдарда, jерлежиске бийик jедимдер ле ачык jол кӱӱнзейли.

 

             А. ТОҤЖААН.                 

 

Добавить комментарий


Защитный код
Обновить

Дополнительная информация