Оҥдойдо аймак-башчыга Мерген Теркин тудулды.

Рейтинг:   / 1

Ӱлӱрген айдыҥ 16-чы кӱнинде Шашыкман јуртта Оҥдой аймактыҥ алтайларыныҥ Курултайы ӧтти. Курултайда беш сурак кӧрӱлген:

  1. Аймак-башчыныҥ ла аймактыҥ тӧс тӧргӧӧзиниҥ эткен ижи керегинде.
  2. Аймак-башчы ла аймактыҥ тӧс тӧргӧӧзин тудары.
  3. Алтай калыктыҥ республикан Курултайына делегаттар тудары.
  4. Улалу каладагы национальный 7-чи таҥмалу школдыҥ јаҥы туразын тудуп баштаары.
  5. Алтайдыҥ ӱстине кресттер тургуспазы керегинде.

Узак ла чокым куучындардыҥ кийнинде бу кӧрӱлген сурактарла мындый јӧптӧр јарадылган:

  1. Алдындагы аймак-башчы болгон Шабыков А.М. Курултайда болбогоны учун, оныҥ оны бу иштеҥ јайымдазын деп угузу бичигин ајаруга алып, А.М. Шабыковты Оҥдойдыҥ аймак-башчызы деген јамызынаҥ чыгарып салар. Аймактыҥ тӧс тӧргӧӧзиниҥ ижин уйан деп баалар.
  2. Оҥдойдыҥ аймак-башчызына Теркин М.М. тудар. Аймактыҥ тӧс тӧргӧӧзин 11 кижинеҥ тудар: аймак-башчы ла 10 сельский поселениелердеҥ бир кижинеҥ. Бастыра јурттарда јурт-башчылар тудар. Бастыра тудулган јурт-башчыларды аймактыҥ курултайыныҥ делегаттары деп автоматически кийдирер.
  3. Алтай калыктыҥ республикан курултайына делегаттар кӧстӧбӧс. Делегаттарды Курултайга кажы аймактаҥ канча кижи кӧстӧлӧтӧн квоталар јӧптӧлзӧ тудар. Бӱгӱнги аймактыҥ курултайыныҥ ижин токтотпос. Курултайдыҥ экинчи бӧлӱгин республикан Курултайга делегаттар тудулза јабар.
  4. Улалуныҥ ла Алтай Республиканыҥ депутаттарына ла бӱдӱрер јаҥдарына Уладудагы сок јаҥыс национальный 7-чи таҥмалу школдыҥ јаҥы туразын келер 2014 јылда тудуп баштазын деп сураар.
  5. Алтай Республиканыҥ Главазына ла орус православный церковьтыҥ Алтайдагы епархиязына Алтайда кресттер тургуспазын деп баштанар.

 

Комментарии   

0 #6 Токшын 23.11.2013 11:37
Каан Озында кандый Курултай откон? Кем билер? Ондойдо Чагаш кандый Курултай откурет? Кем билер? Ойто ло пийттерер кычыдып турган ба айла кандый?
Цитировать | Сообщить модератору
0 #5 Ондо болдым 17.11.2013 07:55
nom-non го. Мӧҥкӱ јанынаҥ чокым јӧп јарадылбаган. Куда ла тойлордыҥ сурагын повесткага кийдирбей јайым куучында делегаттар кӧп айткан. База аҥылу јӧп јарадылбаган. Бу сурактар улусты ӧйкӧп турганы иле билдирип турды. Бу сурактарла јаҥы тудулган аймак-башчы иштезин деп оны молјогондор. Ол јӧпкӧ кирген бе санаама кирбейт. Јок ошкош эди. Ондо секретарь протокол чийген, ондо турушкан ӧскӧ дӧ улустаҥ сурап угугар. Курултай меге јараган, јакшы ӧтти.
Цитировать | Сообщить модератору
0 #4 Ондо болдым 17.11.2013 07:48
Бостойго. Шабыковты корый алып кӧп куучындар болгон. Оныҥ таайы сӧс айтты. Анатолий Марковичтиҥ (АМ) адазы озочыл механизатор болгон, комбайнныҥ алдына киреле јазап јадарда бир аамай неме маҥтадып ийген, адазы божогон. Олор бастыразы албаданып, иштенип ӧскилеген. АМ адазын тӧзӧгӧн балдарын азыраарга ары-бери јорыктап јат, эмеш те болзо аймак-башчыныҥ ижин иштеген. Кӧп улус јымжада айткан, АМ бойыныҥ телефонло айткан созинде бойыныҥ ижин уйан деп темдектеген, кезик ас улус кезем иш эдилбеген, Тӧс Тӧргӧӧ бир де јуулбаган деп айткан. Председатель Курултая Кучинов А.Т. јӧпти јымжада уйан деп айдып колды улус кӧдӱргендер. Мында кем де кемди де јамандабай јат. Бостойдый улус неме болгон болбогон бой-бойысты јамандабаактар деп, та кемниҥ алдына озо јӱгӱрип, очко иштеп турган билбезим. Ийе бис јӧп - бой-бойысты јамандабаактар, иштеектер.
Цитировать | Сообщить модератору
0 #3 Бостой 17.11.2013 07:32
Шыбыков иштерин иштегенле. Бой бойысты jамандашпай ла Курултайларды откуректер.
Цитировать | Сообщить модератору
0 #2 nom-non 17.11.2013 07:28
Ондо болдым, монку кодуриштин сурактарыла jоптор кайда? Артканы узе jакшы. Куда ла тойлордын сурактарын база корор керек.
Цитировать | Сообщить модератору
0 #1 Ондо болдым 17.11.2013 00:02
Курултайда аймактыҥ Главазы М.Г. Бабаев ле депутаттардыҥ совединиҥ јааны Э.М. Текенов туруштылар. Аймак-башчыны тударда экинчи альтернативный кандидатура С.Т. Атаровтыҥ болды. Јажытту ӱнберишле Теркинге 33, Атаровко 17 ӱн берилген. Улалунаҥ А.К. Кине, Н.Е. Мендин ле В.Д. Кудирмеков база болгылап, кажызыла сӧс айттылар. Кыпчактардыҥ јайзаҥы К.Д. Шилыков сӧс айтты. Курултайдыҥ ижин участковый полицейский ле аймактыҥ полициязыныҥ ордынчызы коруладылар. Анайда ок С.С. Тузачинов агаштарга кыйралар бууларын токтодып, эски кыйралардаҥ арчып, башка кыйралар буулайтан немелер эдер керек дегенин Курултай јӧмӧди. Јӱзӱн-базын айылчыларга алтай кеп-кийимди кийдирерин токтодор, озодоҥ бери айылчыларга јӱк ле кур курчайтанын орныктырар деп база јӧп јарадылды. Улус кижиниҥ мӧҥкӱзи чыкса јаш балдар ла јиит ӱй улус мӧҥкӱни ӱйдешпес, сӧӧксалгышта аркы урбас, коромјы болгон билеге болушты акчазыла беретен деп јӧптӧштилер. Курултайдыҥ ортозында ла учында амтанду чайыла Кучинова Л.П. кӱндӱледи.
Цитировать | Сообщить модератору

Добавить комментарий


Защитный код
Обновить

Дополнительная информация